អបអរសាទរពិធីបុណ្យគម្រប់ខួបឆ្នាំទី២៨ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា នាព្រឹកថ្ងៃសៅរ៍ ១១កើត ខែមិគសិរ ឆ្នាំកុរ ព.ស.២៥៦៣ ត្រូវនឹងថ្ងៃទី០៧ ខែធ្នូ ឆ្នាំ២០១៩ នៅវត្តបទុមធម្មយុត្ត ដែលស្ថិតនៅសង្កាត់ចតុម្មុខ ខណ្ឌដូនពេញ រាជធានីភ្នំពេញ។
ជាការពិតវិស័យសាសនា បានរួមចំណែកយ៉ាងច្រើនដល់ការអភិវឌ្ឍ និងការរក្សានូវសុខសន្តិភាពសម្រាប់សង្គមជាតិក្នុងនោះវិស័យសាសនាបានបង្រៀនមនុស្សឲ្យស្គាល់សច្ចភាព សុច្ចរិតភាព បុណ្យនិងបាប នឹងបង្ហាញអំពីមាគ៌ាដើម្បីរំដោះខ្លួនពីសេចក្តីទុក្ខពោលគឺ វៀរចាកអំពើទុច្ចរិត និងអកុសល វៀរចាកទោសៈមោហៈ និងលោហៈ ក្នុងដំណើរឆ្ពោះទៅត្រើយនៃសេចក្តីសុខ។
ទោះយ៉ាងណាក្តី ការពង្រឹងសុខដុមនីយកម្មសាសនា គឺជាកិច្ចការចំពោះមុខមួយដែលរាជរដ្ឋាភិបាលត្រូវតែបន្តខិតខំប្រឹងប្រែងព្យាយាមអនុវត្តគ្រប់កាលៈទេសៈ មិនអាចមើលរំលងបានឡើយ ក្នុងនោះត្រូវធ្វើឲ្យគ្រប់ជនជាតិ និងសាសនិកជនទាំងអស់ នៅកម្ពុជា អនុវត្តកាតព្វកិច្ចជាតិដូចៗគ្នា គឺរួបរួមសាមគ្គីគ្នាស្នេហាជាតិ និងគោរពរដ្ឋ ធម្មនុញ្ញតែមួយ ព្រះមហាក្សត្រតែមួយ និងរាជរដ្ឋាភិបាលតែមួយ ស្របតាមបាវចនាជាតិសាសនា ព្រះមហាក្សត្រ។
ទន្ទឹមនឹងនោះដែរ ការខិតខំប្រឹងប្រែងរបស់រាជរដ្ឋាភិបាលរយៈពេលជាងបីទស្សវត្សរ៍មកនេះ ជាពិសេសការអនុវត្តដោយជោគជ័យនូវយុទ្ធសាស្ត្រឈ្នះឈ្នះរបស់រាជរដ្ឋាភិបាលដែលរាល់ការលំបាក និងឧបសគ្គតូច ធំ ច្រើនរាប់ មិនអស់រួមទាំងការបង្រួបបង្រួមជាតិ លទ្ធិប្រជាធិបតេយ្យនីតិរដ្ឋ ការគោរពសិទ្ធិ និងសេចក្តីថ្លៃថ្នូររបស់មនុស្សក្នុងបុព្វហេតុរក្សាសុខសន្តិភាព ការអភិវឌ្ឍសង្គម សេដ្ឋកិច្ចកម្ពុជាឲ្យឈានឆ្ពោះទៅរកវឌ្ឍនភាព និងវិបុលភាពប្រកបដោយចីរភាពផងដែរ។
ជាមួយគ្នានេះដែរ ពុទ្ធបរិស័ទទាំងអស់សូមចូលរួមជួយជំរុញកិច្ចសហការគ្នាកាន់តែសកម្មក្នុងការពង្រឹងសុខដុមនីយកម្មខាងផ្នែកព្រះពុទ្ធសាសនា នឹងបន្តអប់រំពុទ្ធបរិស័ទឲ្យសាងតែអំពើល្អ ចៀសវាងនូវអំពើបាបទាំងឡាយ ហើយរួមគ្នាដើម្បីអភិវឌ្ឍន៍ប្រទេសជាតិឱ្យមានការរីកចម្រើនកាន់តែខ្លាំងក្លាថែមទៀត ទាំងផ្នែកអាណាចក្រ និងពុទ្ធចក្រនៅក្នុងព្រះរាជាណាចក្រកម្ពុជា។